ປະທານາທິບໍດີ ປາເເລັດສະຕິນ ຢ້ຽມຢາມຈີນ ທາງລັດຖະກິດ
ຕາມຂ່າວສານຊິນຮວາລາຍງານວັນທີ 14 ມິຖຸນາ ນີ້, ຢູ່ນະ ຄອນຫຼວງປັກກິ່ງ, ທ່ານ ສີຈິ້ນຜິງ ປະທານປະເທດແຫ່ງ ສປ ຈີນ ໄດ້ພົບປະກັບທ່ານ ມາມຸດ ອັບ ບາສ ປະທານາທິບໍດີປາເເລັດສະຕິນ ທີ່ເດີນທາງມາຢ້ຽມຢາມຈີນທາງລັດຖະກິດ. ປະມຸກລັດສອງປະເທດໄດ້ປະກາດສ້າງຕັ້ງສາຍພົວພັນຄູ່ຮ່ວມຍຸດທະສາດຈີນ- ປາເເລັດສະຕິນ. ໃນເວລາພົບປະສົນທະນາທ່ານ ສີຈິ້ນຜິງ ໄດ້ສະເໜີຈຸດຢືນ 3 ຂໍ້ໃນການແກ້ໄຂບັນຫາປາເເລັດສະຕິນ ຄື: ໜຶ່ງ, ຫົນທາງແກ້ໄຂບັນຫາປາເເລັດ ສະຕິນໂດຍພື້ນຖານ ແມ່ນສ້າງປະເທດປາເເລັດສະຕິນທີ່ຖືຊາຍແດນປີ 1967 ເປັນພື້ນຖານ, ຖືເຢລູຊາເລັມຕາເວັນອອກເປັນນະ ຄອນຫຼວງ ແລະ ມີອະທິປະ ໄຕສົມບູນ. ສອງ, ຄວາມຕ້ອງການດ້ານເສດຖະກິດ ແລະ ຊີວິດການເປັນຢູ່ຂອງປະຊາຊົນປາເເລັດສະຕິນ ຕ້ອງໄດ້ຮັບການຮັບປະກັນ ແລະ ສາມ, ຕ້ອງຍຶດໝັ້ນ ເສັ້ນທາງຖືກຕ້ອງໃນການເຈລະຈາສັນຕິພາບ. ຈີນຍິນດີເສີມຂະຫຍາຍບົດບາດຕັ້ງໜ້າເຂົ້າໃນການບັນລຸຄວາມປອງດອງພາຍໃນປາເເລັດສະຕິນ ແລະ ຊຸກຍູ້ການ ເຈລະຈາສັນຕິພາບ. ພາຍຫຼັງການພົບປະ, ປະມຸກລັດສອງປະເທດໄດ້ຮ່ວມກັນລົງນາມໃນສະແຕມມື້ທຳອິດໃນການລະນຶກວັນສ້າງຕັ້ງສາຍພົວພັນຈີນ-ປາເເລັດ ສະຕິນ ຄົບຮອບ 35 ປີ ແລະ ເປັນສັກຂີພິຍານໃນພິທີເຊັນເອກະ ສານຮ່ວມມືລະຫວ່າງສອງຝ່າຍຫຼາຍສະບັບ. ສອງຝ່າຍໄດ້ເຜີຍແຜ່ “ຖະແຫຼງການຮ່ວມລະ ຫວ່າງ ສປ ຈີນ ແລະ ປາເເລັດສະຕິນ ກ່ຽວກັບການສ້າງຕັ້ງສາຍພົວພັນຄູ່ຮ່ວມຍຸດທະສາດ”.
ແຫຼ່ງທີ່ມາ: ໜັງສືພິມກອງທັບ
ວັນທີ 19/06/2023